Hileko artxiboak: 2014-11

E-posta baten historia

Teknologiaren eta pertsonen arteko koordinazioak ahalbidetzen du beti e-posta garaiz eta egoki jasotzea. Kasu hau, ordea, ez da horietako bat.

EHUko errektoreordetzaren mezuaren zati bat:

Honekin batera, UPV/EHUren  Ikasleen Kontseiluak bihar, azaroak 27, lanuzte adakemikoa egiteko deialdiak bete behar dituen ukanbeharrak  betetzen direla jasotzen duen erabakia bidaltzen dizut.

Atxikituta, bi pDF fitxategi, euskaraz eta gazteleraz, goian aipatutako erabakiarekin. PDFaespero denaren kontra, bi irudi dira (bat orri bakoitzeko). Nahiz eta sarrera honen helburua hau ez den, errango dut horrelako abisuak irudi batean agertzea onartezina zaidala. Nik badaukat irudiaren testua emaitza hobe edo okerragoekin ateratzeko teknologia , baina hau ezin da egoera orokor bezala inolaz ere hartu.

Buelta gaitezen ordea sarreraren helburura. Atzo, azaroak 27, zen lanuzte akademikoa. Noiz jaso nuen eposta? Atzo, gaueko bederatzietan. Euskaraz Blai blogean, nire klaseko beste blog batean, sarrera honetan batzuei ailegatu ez zitzaiela diote.

Momentuz akats teknikoak ageri dira: eposta ikasle guztiei (ikasle.guztiak, erabiltzaile originala benetan) bidali zaie. Ez dakit zenbat ikasle garen, baina normala iruditzen zait guztiei segidan ez iristea. Arraroa dena, hala ere, da niri teorian bidali zenean iritsi zitzaidala, e-mailaren iriste ordua goiburuetan begiratuta. Beraz, posible da nire posta begiratzeko aplikazioek deskargatu ez izana.

Hala ere, pertsonen akats larri bat ere badago; izan ere, posta berriro begiratuta, azaroaren 27an 8:33ean bidalia zela ikusten da. Gomendio bat, EHUko errektoreordeari: e-posta bidaltzeko orduan, bidali garaiz, eta bihar jartzen badu, hurrengo eguneko kontua izan dadila, ados?

Irudi irisgarriak, mesedez!

Kaixo lagunok! Gaurko sarreraren informazioa oso garrantzitsua dela uste dudalako idazten dut; hala ere, ez dakit zenbat pertsonek irakurriko duen, eta irakurtzen dutenetatik zenbatek kasu eginen dioten. Honen arrazoia honako hau da: erabiltzaileen kopuru hain txikiari egiten dio mesede, ezen pentsatzekoa da, nahiz eta egin beharreko gauza den, nahiz eta etikoki hobea izan, jendeak “paso” egitea. Tamalgarria litzateke, benetan, baina zer egingo diogu ba?

Gogoeta depresibo hauek alde batera utzita, hona hemen jakin beharrekoa.

Irudi bat irudi denez, nola egin daiteke irisgarri?

Pantaila-irakurgailu batek, noski, ezin ditu irudiak interpretatu. Hala ere, webguneak garatzerakoan, garatzaileak irudiei testu alternatiboa gehitzen badie, pantaila irakurgailu batek testu hau irakurriko du. Hau, noski, WordPressen ere egin daiteke, modu simpleagoan (Blogariak-ek WordPress erabiltzen du).

Nola egin

Jadanik, jakina da irudiak mediatekara igotzen badakizuela (MediaGehitu media), baita bidalketa eta orrialdeetan txertatzen ere (gehitu media). Beraz, hortik aurrrerako pausuak zein diren zehaztuko dut.

Konfigurazio hau bidalketan bertan egin behar da. Txertatu nahi den irudia aukeratzean, hainbat aukera agertuko dira, gehienak testu eremuak. Hona hemen kontuan hartu beharrekoa:

  • Izenburua: Eremu hau hutsik ez badago, irudiaren gainean sagua jartzen bada, tooltip bat agertuko da, eremu honen edukiarekin. Hala ere, testu alternatiborik ez baldin badu eta esteka bat ez baldin bada, utzi hutsik, mesedez.

  • Argazki oina: Hau irudiaren azpian agertzen denez, agertu edo ez ez du garrantzirik.

  • Testu alternatiboa: Deskribatu irudia modu laburrean, irudia ikusten ez duen batek informazio hau jasoko duela kontuan hartuta. Hortaz, irudiak ez du zertaz beti deskribapen zehatz bat eduki behar, deskribapena irudia ulertzeko garrantzitsua denean soilik eman behar baita. Kasua hau ez denean, testua irudiaren funtzioaren araberakoa izan behar da. Irudiak testua badu, adibidez, jarri testua.
    Beste adibide bat, Wikipediatik hartua:

    For example an image of a warning sign should not have alt text “a triangle with a yellow background, black border and an exclamation mark”, but simply “Warning!”—unless, of course, the alt text’s purpose is to show what the warning symbol actually looks like.

    Irudi dekoratibo bat baldin bada eta esteka bat ez baldin bada, hutsik utz daiteke, izenburu eta testu alternatiborik gabeko irudiak ez baititu pantaila-irakurgailuak detektatzen.

  • Azalpena: Utzi bete gabe, beharrezkoa den informazio guztia testu alternatiboan jarri behar baituzue.

  • Lerrokatzea: Nahi duzuena.

  • Estekaren helburua: Izenbururik eta testu alternatiborik gabeko irudia bada, aukeratu Bat ere ez. Bestela, aukeratu edozein agertzen diren lau aukeren artean. Media fitxategia aukeratuz gero, testu alternatiboan aditzera eman, “egin klik handian ikusteko” edo horrelako testu batekin.

  • Tamaina: Nahi duzuena.


Ene! Zer da hau? Oharrik gabeko sarrera tekniko bat! Bai, ni ere harrituta nago. Beti bezala, utzi iruzkin bat zalantzarik edukiz gero. Hurrengorarte!

Klik batean eLiburutegian

     Asteazkenean, Gasteizko Ibaiondo liburutegian, liburu digitalen mailegu zerbitzuari buruzko aurkezpen bat egon zen. Jadanik martxan jarrita dagoen eLiburutegia,  Euskadiko liburutegi digitala, sustatzeko eta handitzeko egin izan duten proiektua aurkeztu zen. Hortaz, Euskal Herriko liburutegiko erabiltzaileek liburu digitalak eskura izango dituzte,  doanik! Gaur egun eLiburutegian 1.500 liburu daude baina Joxean Muñoz Kultura sailburuordeak dioenez kopuru hori bikoiztuko da urte bukaerarako. Zifra esanguratsuak ezta?

    Eusko Jaurlaritzako Kulturako sailburuak Cristina Uriartek lau ardatzetako proiektua dela nabarmendu du. Lau horiek Eusko Jaurlaritza, liburuzainak, argitaletxeak eta irakurleak dira. Alabaina, irakurleak dira proiektu hori aurrera eraman dezaketen bakarrak. Azken finean, hauek barik proiektua ez zen inora helduko, horregatik proiektuan ikusitako hutsuneak eta aldaketak proposatu ahal izango dituzte. Liburuzainek,  aldiz,  plataformara igoko diren liburuak aukeratuko dituzte.

     Plataforma digitalean parte hartu nahi dutenek N.A zenbakia eta Euskadiko Irakurketa Publikoko Sareko erabiltzaile pasahitza erabili beharko dituzte. Erraza dirudi! Ordenagailuetan, smartphone-etan, liburu irakurgailuetan eta tablet-etan liburuak deskargatzeko aukera egongo da.  Maileguak 21 eguneko  izango dira eta bi eratan eskuratu ahal izango dira. Batetik, liburua deskargatuta eta bestetik, on-line. Azken aukera horretarako, noski, Interneteko konexioa beharko da. Mailegua amaitzear dagoenean, 5 egun falta direnean, irakurleek ohar bat jasoko dute, ohartarazi daitezen eta garrantzitsuena dena, liburua berriz itzultzeko ez dute ezer egin behar, plataformak berak berreskuratuko ditu.

     Hala eta guztiz ere, teknologiekin oso trebeak ez direnak edo papereko liburuak gustuko dituztenak liburutegietara jo dezakete inolako arazorik gabe. Besteek liburu ugari doan eta modu seguruan eskuragarri izango dituzte Interneten.

       Bukatzeko, esan dezakegu albiste baikorra dela.  Euskarak teknologietan parte hartzen duen heinean,  euskara pixkatxo bat bultatzen dugu eta gaur egun guztiok teknologietan oso trebeak garenez, berria ezin hobea da. Gainera, literatura modu eskuragarriago batez izateko aukera paregabea da. Doinik gainera, beraz ezin dugu esan liburak edo literatura orokorrean gauza garestia denik, plataforma honekin trikimailu horrek ez du balio. Hasi beraz euskarazko liburuak irakurtzen, ikusiko duzue zenbat ikasten den eta zelako aberastasuna ematen duten!

http://www.berria.eus/paperekoa/1787/028/001/2014-11-27/literatura_klik_batean.htm

Gabonak laster helduko dira eta horrekin batera loteriako iragarkia

     Pasa den urtean loteriari buruz egin zuten iragarkia nahiko polemikoa izan zen. Baina sarrera honetan, 2014ko iragarkiari buruz hitz egin nahi dizuet. Ikusi al duzue?
Urte honetakoa polita dela esan daiteke. Hunkigarria, behintzat, bai. Ikusi ez baduzue zertaz doan kontatuko dizuet, zuek zeuen ondorioak atera ahal  izateko .

      Gabonak dira eta senar-emazte bikote bati ez zaie loteria tokatu. Justu aurten erosi ez duten lekuan tokatu da, etxe aurrean dagoen tabernan, alegia.  Emazteak senarrari  tabernara joatea aholkatzen dio  zorionak ematera. Senarra nahiko samindurik hara doa eta kafe bat eskatu ondoren, tabernaria zoriondu egiten du. Ordaintzerako orduan, gizonak zenbat den galdetu ostean, tabernariak hogeita bat euro direla erantzuten dio. Senarrak harriturik zergatik ordaindu behar duen hainbeste galdetzen dio. Tabernariak honako hau esaten dio: “Euro bat kafeagatik eta…” gutunazal bat ateratzen du eta honela jarraitzen du : “…eta hogei euroak honengatik”. Suposatu duzuenez gutun-azalean loteriako hamarrekoa (partizipazioa) zegoen. Zer iruditzen zaizue?

    Nire ustez, bi aldeetatik ikusi daiteke. Batetik, iragarki afektiboa dela inork ez luke ezeztatuko baina eskuzabaltasunaren ideia ere argi eta garbi agerian jartzen du. Alde horretatik oso hunkigarria da. Baina bestetik, iragarki guztiek dute zerbait transmititzeko helburua edo xedea eta honako hau ez da salbuespena. Loteriako hamarrekoa (partizipazioa) erosteko grina zabaltzeko helburu garbia dauka, edo beste modu batean esanda, dirua zorian gastatzeko xedea du. Gainera, pentsatu dezakegu tabernariaren eskuzabaltasuna oso ondo dagoela baina ez dio boletoa oparitzen, inola ere ez, partizipazioa erostera nolabait behartzen du.  Jakina, boletoa sarituta egonda,  nork ez luke horregatik ordainduko?

Agertzen den beste aspektu okerra diruaren ikusmoldea da. Izan ere, senarra tabernan sartzean, denak edaten daude jasoko duten diru mordoa ospatzeko. Baina horrek ez du dirua oso preziatua delaren irudia ematen? Nire iritziz, diruak ez du zoriona ekartzen eta justu hori da iragarkian transmititzen dena, diruagatik  dator poztasun guztia.

     Bukatzeko, aipatu behar da, goiko guztia ikuspegi bat besterik ez dela eta iragarkia gustuko izan dezakezue edo ez. Azken egun hauetan izan duen eztabaida ikusita, honen inguruko gogoetatxo bat egitea bururatu zitzaidan eta hau izan da atera dena.

Besterik gabe.

Iragarkia ikusteko esteka: https://www.youtube.com/watch?v=ei-_M_3aTyI

Nola egin “Klaseko beste blogak” orrialdea

Kaixo denoi! Jakingo duzuen bezala, gure blogaren menuan badago osagai bat klaseko beste blogak orrialdera eramaten duena. Orrialde horretan, izenburuak argi azaltzen duen bezala, gure klasean sortutako beste blogak daude.

Blogak aurkezteko momentua heltzen denean, beti gauza bera gertatzen da. Ezin 10 blogetako helbideak gogoratu, eta jendeak, irakasleak aholkatuta, gure bloga erabiltzen du blog batetik bestera joateko.

Beraz, beste blogariekin justuak izateko, hona hemen hau lortzeko egin beharrekoa: sortu orrialde bat eta sartu hurrengo kodea Testu editorean. Bai, bisualean ere egin daiteke, baina hori, hemen kodea edukita, prozesu luzeagoa da (estekak banan-banan sartu eta etiketatzea, alegia).

<ul>
<li><a href="http://euskarazblai.blogariak.net">Euskaraz Blai</a></li>
<li><a href="http://sustraieieutsizzeruaikutuz.blogariak.net">Sustraiei eutsiz Zerua Ikutuz</a></li>
<li><a href="http://hitzetapitz2014.blogariak.net">Hitz eta Pitz</a></li>
<li> <a href="http://hegohaize.blogariak.net">Hego-haizeak dakartzan hitzak </a>
<li><a href="http://hitzakdiragiltza.blogariak.net">HITZA DA GILTZA</a></li>
<li><a href="http://irekibegiak.blogariak.net">Ireki begiak</a></li>
<li><a href="http://euskarazbarriketan.blogariak.net">EUSKARAZ BARRIKETAN</a></li>
<li><a href="http://faltazirenak.blogariak.net">Falta zirenak</a></li>
<li><a href="http://euskaraburuan.blogariak.net">Euskara buruan ' ta ibili munduan!</a></li>
<li><a href="http://wordmakers.blogariak.net">Word makers</a></li>
<li><a href="http://gureadageroa.blogariak.net">Gurea da geroa</a></li>
</ul>

Beti bezala, oharrak

  • Hemen nire bloga ere sartu dut, txantiloia osorik izateko.
  • Norbaitek bere bloga zerrendatik kendu nahi badu (nire ustez jarrera logikoena) ken dezala bere blogari erreferentzia egiten dion zerrendaren osagaia (<li> testuarekin hasita </li> testura arte, biak barne).
  • Orrialdean bertan orrialdeko esteka iraunkorra edita dezakezue, errazago aurkitzeko. Gureari besteak deitu diot, adibidez.
  • Beti bezala, norbaitek zalantzarik badu (edo kasu honetan interesa kode horren esanahia jakiteko), utz dezala iruzkin bat.

Espero dut erabilgarria suertatzea. Hurrengorarte!

‘Iragana aurretik’ elkarrizketa Berri Txarrak-ekin

Iragana aurretik dokumentalaren lehenengo zatian, Berri Txarrak-en 20 urtetan zehar izandako istorioa eta bidea kontatzen digute. Gorka Urbizuk, talde honen partaide nagusietariko batek, taldearen hastapenerako funtsezkoak izan ziren lekuak erakutsi dizkigu, Lekunberrin zehar. Gorka Urbizuri, leku desberdinetan izandako elkarrizketa sakonak lotzen ditu ibilbide horretako pasarteak. Gorkak kontatzen digun istorioan, zuzeneko emanaldietako eta nazioarteko biretan grabatutako irudiak agertzen dira, baita garai guztietako argazkiak ere, horietako askok lehen aldiz erakutsiak.

Badok, Berria, Debolex, Dijitalidadea eta Berri Txarrak-en artean lankidetzan egindako ekoizpena da Iragana aurretik.

Bukatzeko, Berri Txarrak taldearen oso gustoko dudan abesti bat hementxe uzten dizuet:

http://www.youtube.com/watch?v=H-KUCUjRCec

Autismodun haurrak eta teknologia

Gaur, The New York Times egunkarian agertutako berri bat erakutsi nahi dizuet. Nik Tech in the Trenches blogari esker izan nuen albistearen berri. Berriak autista den mutiko bat Appleren Sirirekin lagun hoberen nola bihurtu den kontatzen digu. Berria arras interesgarria da, baina iruzkinak ere kontuan hartzekoak dira. Berrian haurrak Sirirekin hizketan trebetasun sozialak lortzen dituela erraten da. Iruzkinetan, hori ezeztatu gabe, gehiegizko orokortzearen arriskua aipatzen da, hau da, haurrak gizakiek horrela erantzunen diotela beti pentsatzearena. Zuek zer uste duzue?

Euskahaldun. KO – RRI – KA !

Hemen da Korrikaren 19. edizioa. Urepeletik abiatuko da martxoaren 19an, eta 29an amaitu Bilbon handian. Baina, edizio hau ez da gainontzekoak bezalakoa izango. Izan ere, oraingo honetan AEK-k norberaren nahaiak indartzeko dei egin nahi dio Euskal Herri osoari.

 “dakienak erabil dezan eta

ez dakienak ikasteko ahalegina egin dezan”

 

AEK-ko kideek aipatutako edizioaren aurkezpena egin zuten Bilboko Arriaga Antzokian, eta bertan ere, elkartasun mezu bat igorri nahi izan zioten biztanleri euskaldunari. Hona hemen euskalduntze koordinadorak Korrikan zabaldu nahi duen mezua: “Euskal Herria euskalduntzeko norberaren eta taldearen ahalmenean sinetsi eta erabil dezagun ahalmen hori” (Asier Amondo, lasterketako arduradun berria).

Modu honetara, aipatu den lez, ahaleginak batzeko eta auzolana indartzeko beharraren deialdia egin zuen taldeak.

Beraz, parte hartu dezagun!

Berreskuratu dezagun tour linguistikoa!

2013an Hernanin tour linguistikoa deritzona burutu zen. Baina, zertan datza horrek?

Bada, bertako herritarrak elkartu eta taldean herrian zehar joan ziren kontalari baten laguntzarekin. Hernani osoan zehar zihoan ordu eta erdiko bidaia horretan, bospasei tokitan gelditu ziren. Gisa honetara, geldialdi bakoitzean garai hura bizi izan zuten pertsonek kontakizun laburrak kontatzen zizkien gainerako taldekideei.

Bide batez, tourra amaitu ostean, Euskararen aurrerapauso zein galerei erreparatu zieten eta horien inguruan jardun zuten.

Euskararen erabilera sustatzeaz gain, ez al zaizue iruditzen ligatzeko aitzakia ona ere badela? Ligoteo sanoa, gainera! Herritarrak elkar ezagutu dezaten, bizipenak partekatu ditzaten, elkarrekin gustura senti daitezen…

Bla bla bla

   Asteazkenean hizkuntzalaritza irakasgaian hizkuntza jabekuntzari buruz hitz egin genuen. Beste modu batean esanda, nola sortzen den hizkuntza gizakion burmuinean. Ez al da benetan gauza harrigarria ?

    Umeei buruz hitz egin genuen eta bideo bat ere ikusi genuen. El mundo en pañales dokumental sortatik laugarren kapitulua ikusi genuen, el poder de las palabras izenekoa. Guztiok eduki dugu edo edukiko dugu ume txikiren bat familiaren barruan (edo lagun batena bai, behintzat). Dokumental hori bikaina da umeen adibide sinpleekin hizkuntza jabekuntza gaia aurkezten duelako. Modu oso erraz eta ulergarri batean azaltzen digu umeek duten kapazitatea hizkuntza baten aurrean eta nola esfortzu barik eta berez etortzen zaie hitz egiteko ahalmena.

     Kapitulu hori ikustean familian daukadan zortzi hilabeteko umea etorri zitzaidan burura. Umea zezelka egiten duen bakoitzean, ama berarekin elkarrizketa moduko bat izaten ahalegintzen da. Imaginatu dezakezuenez, egoera oso komikoa da. Noski, bien arteko hartu-emana ez da guk ezagutzen dugun elkarrizketa sakona baina parekotasun bat badauka. Ikustekoa da, beraz, umeek hain txikiak izanik nola hitz egiteko sahiakerak egiten dituzten, nahiz eta guk ez ulertu. Gainera, ume zoragarri hori zezelka ikusten dudan bakoitzean, “amarekin berbetan”, hunkitzen nau. Zortzi hilabete besterik ez ditu eta badaki begirada batekin jostailu bat eskatzen!

     Irakasgaian ikasi dugunez, guztiok hizkuntza jakintza batekin eta berberarekin jaiotzen gara. Horrek egiten gaitu gizaki eta beste espezietatik bereizten gaitu. Niri horrek izugarri harritzen nau, zuei ? Ez al duzue uste hizkuntza dela gizakiok daukagun makineriarik perfektuena?

     Bukatzeko, animatzen zaituztet zezelka ari den ume batekin hitz egitera, ikusiko duzue nola erantzuten duen estimuluen aurrean (estimulua, noski, gure hitzak izanik). Umearen erreakzioa antzemango duzue eta haren sahiakera anitzak gauzak komukikatzeko eta benetako elkarrizketa bat izateko. Hasieran soinuak besterik ez dira izango. Baina gero, denbora pasatu ahala, hitzen parekoak ekoiztuko ditu . Azkenean hitzak ahozkatuko ditu eta esaldi konplexuak egiteko ahalmena izango du. Gaiari buruz hausnartu al duzue noizbait? Ikusi bideoa , pentsatu eta batez ere, gozatu!

https://www.youtube.com/watch?v=sZYD9UsiX8A